Ladislav Borbely, ekspert sllovak i futbollit, vlerësoi se Kosova është më e mirë se pozita e saj aktuale në renditjen e FIFA-s. Deklarata u bë në një intervistë për median sllovake „Pravda”.
Kosova renditet e 79-ta, ndërsa Sllovakia është e 44-ta. “Dy ekipet janë të balancuara në kuptimin e vlerës. Dy apo tre milionë nuk bëjnë dallim. Jemi më mirë në renditjen e FIFA-s, por kjo nuk tregon shumë. Kosova është në rritje të madhe. Pozita e saj është larg përfaqësimit të forcës momentale, e cila është shumë më e madhe dhe e ngjashme me tonën”, tha Borbely.
Ai shpjegoi se e ka studiuar Kosovën dhe ka nxjerrë përfundime interesante. “Është ekip i talentuar nga Ballkani, me elemente të mentalitetit gjerman. Falë përzgjedhësit Franco Foda, ia doli të bëjë përmirësime në elementet natyrale, që ia mundësojnë të konkurrojë në nivel evropian”.
Ish-trajneri i shumë skuadrave theksoi se Kosova vepron racionalisht dhe zgjedh situatat me pragmatizëm. Lojën e saj e cilësoi të qëndrueshme. Ai nuk pret që lojtarët kosovarë të hyjnë në ndeshje me rrëmbim dhe emocionalitet të tepërt. “Franco Foda do të kujdeset për këtë”, shtoi.
Borbely shprehu shpresën që shqiponja dykrenare mos të fluturojë mbi Bratislavë, por vlerësoi se është e vështirë të parashikohet favoriti.