Në kuadër të operacionit policor “The Wanted”, u finalizuan procedurat për ekstradimin nga Spanja në Shqipëri të shtetasit Algert Zeneli, 26 vjeç, banues në Milot. Ky shtetas ishte shpallur në kërkim ndërkombëtar që nga viti 2023.
Gjykata e Shkallës së Parë të Juridiksionit të Përgjithshëm Shkodër i ka caktuar masën e sigurisë “arrest në burg” për veprat penale “Kultivimi i bimëve narkotike”, “Prodhimi dhe shitja e narkotikëve”, “Grupi i strukturuar kriminal” dhe “Kryerja e veprave penale nga organizata kriminale ose grupi i strukturuar kriminal”.
Nga hetimet rezulton se gjatë vitit 2023, në fshatin Kir të Njësisë Administrative Pult, si dhe në zona afër fshatit Theth, në territorin e Shkodrës, Algert Zeneli dyshohet se ka kultivuar 10 900 bimë të dyshuara narkotike të llojit Cannabis Sativa, në bashkëpunim me anëtarë të tjerë të një grupi të strukturuar kriminal.
Ekstradimi u bë i mundur falë bashkëpunimit të ngushtë ndërmjet specialistëve të Interpol Tirana dhe homologëve të Interpol Madrid. Shkëmbimi i informacionit dhe koordinimi operacional çuan në lokalizimin, kapjen dhe kthimin e tij në Shqipëri.
Autoritetet shqiptare do të vazhdojnë procedurat e mëtejshme ligjore ndaj të ekstraduarit.