Një ngjarje e rëndë ka ndodhur pak pas mesnatës në Vorë, ku ka humbur jetën 50-vjeçari Edmond Sula, i njohur edhe me emrin Ali Sula. Viktima u gjet i pajetë pranë derës së banesës së tij, pasi u godit me një plumb të vetëm.
Sipas të dhënave paraprake nga grupi hetimor, vrasja dyshohet se është kryer nga një distancë e konsiderueshme, duke përdorur një armë me precizion të lartë të pajisur me dylbi. Mungesa e gëzhojave në vendin e ngjarjes përforcon dyshimin se autori ka qëlluar nga një largësi e konsiderueshme.
Hetuesit kanë nisur verifikimet mbi aktivitetin e viktimës, i cili merrej me shit-blerje pronash. Konfliktet e mundshme që mund të kenë lindur gjatë kësaj veprimtarie janë vënë në qendër të pistave të hetimit. Policia vijon punën për mbledhjen e provave të tjera që mund të çojnë në identifikimin dhe kapjen e autorit të këtij krimi.