Një 50-vjeçar ka mbetur i vrarë me armë zjarri pak pas mesnatës në fshatin Bërxullë të bashkisë Vorë. Viktima është identifikuar si shtetasi Edmond (Ali) Sula. Sipas të dhënave paraprake, ngjarja ka ndodhur teksa viktima ishte duke lëvizur në këmbë dhe po hynte në ambientet e banesës së tij.
Në njoftimin zyrtar, Policia e Shtetit bëri me dije se ngjarja është regjistruar rreth orës 00:10. Menjëherë pas marrjes së njoftimit, një grup i posaçëm hetimor, nën drejtimin e Prokurorisë, ka mbërritur në vendngjarje për të sqaruar rrethanat, fiksuar provat materiale dhe identifikuar autorët e përfshirë në këtë krim.
Aktualisht, shërbimet e policisë kanë ngritur pika kontrolli në zona strategjike dhe po ushtrojnë kontrolle intensive, me qëllim lokalizimin dhe kapjen e autorëve të dyshuar.
Përditësime
Burime nga grupi hetimor konfirmojnë se 50-vjeçari ka ndërruar jetë në vendngjarje, si pasojë e të shtënave me armë zjarri në Bërxullë. Aktualisht, Policia e Shtetit ka rrethuar zonën, ndërsa grupi hetimor po vijon me këqyrjen e vendit të ngjarjes dhe mbledhjen e provave materiale.
Hetimet për vrasjen e Edmond (Ali) Sulës në Bërxullë po përqendrohen në lëvizjet e viktimës pak çaste para atentatit. Sipas burimeve nga Policia e Shtetit, 50-vjeçari kishte ndjekur ndeshjen Angli-Norvegji në një lokal të zonës përpara se të qëllohej për vdekje. Autorët hapën zjarr nga një distancë prej 30-40 metrash sapo viktima zbriti nga automjeti, ku ndodhej edhe një person tjetër, i cili pritet të merret në pyetje. Grupi hetimor po analizon pamjet e kamerave të sigurisë dhe po heton konfliktet e mëparshme të viktimës për të identifikuar autorët.