Një ngjarje e rëndë ka ndodhur gjatë paradites së të hënës në zonën e Kamzës, ku një konflikt për motive të dobëta ka rezultuar fatal për 27-vjeçarin Ardian Baloshi. Sipas njoftimit zyrtar të Policisë së Shtetit, ngjarja është regjistruar rreth orës 11:25, kur viktima është transportuar në spital pa shenja jete pas të shtënave me armë zjarri.
Grupi hetimor, nën drejtimin e Prokurorisë, ka kryer veprimet procedurale në vendin e ngjarjes, konkretisht në rrugën “Dervish Luzha”. Nga provat e administruara, policia ka identifikuar si autor të dyshuar shtetasin Sadik Llanaj, 39 vjeç, i cili është shpallur në kërkim.
Në operacionin për lokalizimin dhe kapjen e autorit janë angazhuar forca të shtuara policore, ndërsa në akset kryesore janë ngritur pika kontrolli. Autoritetet sqarojnë se 39-vjeçari dyshohet se është larguar me mjetin e tij pas kryerjes së veprës penale. Policia theksoi se nga kjo ngjarje nuk ka persona të tjerë të dëmtuar dhe po punohet për zbardhjen e plotë të rrethanave të konfliktit.
Përditësime
Hetimet për vrasjen në Paskuqan zbuluan se konflikti nisi pas një përplasjeje në një fushë futbolli mes dy fqinjëve. Viktima u dërgua për ndihmë mjekësore në Spitalin e Traumës nga kalimtarë të rastit. Drejtori i Policisë së Tiranës, Oliger Torba, konfirmoi angazhimin e forcave RENEA për kapjen e autorit, i cili konsiderohet me rrezikshmëri të lartë. Grupi hetimor po vijon këqyrjen e kamerave të sigurisë dhe marrjen në pyetje të dëshmitarëve.