Zëdhënësi i Komisionit Qendror të Zgjedhjeve (KQZ), Valmir Elezi, deklaroi se procesi i rinumërimit të vendvotimeve pritet të përmbyllet gjatë ditës së sotme, më 30 janar 2026.
Në Qendrën e Numërimit dhe të Rezultateve zhvillohet dita e fundit e këtij procesi për vendvotimet e përcaktuara më herët nga KQZ. Sipas Elezit, kanë mbetur të përfshihen më pak se 60 vendvotime që i takojnë tri komunave: Prishtinë, Suharekë dhe Shtërpcë.
Ai theksoi se i gjithë procesi do të përfundojë brenda ditës, ndërsa KQZ do të veprojë sipas procedurave ligjore për rezultatet përfundimtare. «Procesi i rinumërimit do të përmbyllet gjatë ditës së sotme, ndërkaq në lidhje me rezultatet përfundimtare, Komisioni Qendror i Zgjedhjeve në ndërkohë do të caktojë mbledhjen e radhës, ku në rend të ditës do të jetë shpallja e rezultateve përfundimtare dhe për këtë do të njoftojmë me kohë», u shpreh Elezi.
Pas përmbylljes së rinumërimit, KQZ pritet të njoftojë opinionin publik për hapat e mëtejshëm drejt shpalljes zyrtare të rezultateve përfundimtare të zgjedhjeve.