Peter Sorensen, përfaqësuesi special i Bashkimit Evropian për dialogun Beograd-Prishtinë, u takua sot në Washington me zyrtarin e lartë të Departamentit Amerikan të Shtetit, Brendan Hanrahan.
Takimi u mbajt në orën 11:15 të mëngjesit sipas kohës lokale amerikane, në selinë e DASH-it.
Në njoftimin zyrtar të Departamentit të Shtetit thuhet: «Zyrtari i Lartë i Byrosë Hanrahan takohet me Përfaqësuesin Special të Bashkimit Evropian për Dialogun Beograd-Prishtinë, Peter Sørensen, në Departamentin e Shtetit».
Ky takim ishte i mbyllur për shtyp dhe nuk u dhanë detaje për temat e diskutuara.
Udhëtimi i Sorensenit në Shtetet e Bashkuara vjen pas arritjes së marrëveshjes së fundit me Qeverinë e Kosovës, të udhëhequr nga kryeministri Albin Kurti, lidhur me Ligjin për të Huajt.
Disa burime e lidhin këtë marrëveshje me çështjen e serbëve në Kosovë.
Hanrahan ka pasur takime të mëparshme me udhëheqësit kosovarë, si kryeministrin Kurti dhe presidenten Vjosa Osmani, gjatë vitit 2025.
Përditësime
Emisari i BE-së Sorensen deklaroi në X se në takimin me zyrtarin Hanrahan në Washington, diskutuan dialogun, arritjet e fundit dhe harmonizimin e hapave të ardhshëm.
Marrëveshja përfshin masa shtesë për Ligjin për të Huajt dhe Ligjin për Automjete:
- Leje pune 12-mujore për punëtorë serbë në arsim dhe shëndetësi;
- Leje të ngjashme për studentë serbë.
Emisari i BE-së Sorensen postoi në X: “Takim i shkëlqyer me Brendan Hanrahan, zyrtarin e lartë të Byrosë për Çështje Evropiane dhe Euroaziatike në Departamentin e Shtetit. Diskutuam për dialogun, shqyrtuam arritjet e fundit dhe siguruam harmonizimin në hapat përpara”.