Enver Hasani: Presidentja Osmani ka gabuar me shpërndarjen e Kuvendit

Enver Hasani, ish-kryetari i Gjykatës Kushtetuese dhe profesor i së drejtës ndërkombëtare, e ka vlerësuar si profesional aktgjykimin e Gjykatës Kushtetuese që rrëzoi dekretin e presidentes Vjosa Osmani për shpërndarjen e Kuvendit dhe afatin 34-ditor shtesë për zgjedhjen e presidentit.

Ai thekson se arsyetimi juridik i vendimit është korrekt, por gjuha e përdorur në dispozitiv reflekton njëfarë hezitimi nga Gjykata për ta emërtuar drejtpërdrejt situatën si vendim kundërkushtetues të Osmanit. Këtë hezitim e lidh me presionin dhe frikën e bërë institucionit, duke përmendur edhe rrezikun fizik për disa gjyqtarë në të kaluarën.

Sipas Hasanit, aktgjykimi nuk prodhon pasoja direkte juridike për presidenten, pasi objekti i shqyrtimit ka qenë vetëm kushtetutshmëria e dekretit dhe jo përgjegjësia e saj personale. "Kur një akt juridik nuk prodhon asnjë efekt juridik, atëherë kemi të bëjmë me pavlefshmëri absolute të aktit. Ky është një emërtim tjetër për të thënë se dekreti ka qenë tërësisht kundërkushtetues", thotë ai.

Ky konstatim e bën dekretin juridikisht të pavlefshëm, "sikur të mos kishte ekzistuar fare", duke e cilësuar si shkallën më të lartë të kundërkushtetutshmërisë. Hasani konsideron se Vjosa Osmani ka gabuar me vendimin për shpërndarjen e Kuvendit, pasi një kompetencë e tillë nuk ekziston në asnjë sistem parlamentar evropian si kompetencë autonome e kreut të shtetit.

Ai sqaron se objekt i çështjes nuk ka qenë vlerësimi nëse presidentja ka shkelur Kushtetutën, por nëse dekreti është kushtetues. Për çdo procedurë eventuale ndaj presidentes, sipas tij, duhet iniciuar veçmas nga të paktën 40 deputetë në Gjykatën Kushtetuese, duke argumentuar shkeljen e Kushtetutës dhe duke u mbështetur në këtë aktgjykim. Kjo procedurë është e ndarë nga shkarkimi i presidentit, i cili kërkon shumicë prej dy të tretash në Kuvend.