Jeffrey Epstein dëshironte të blinte ndërtesën e ish-ambasadës së Jugosllavisë në New York, të njohur si "Vila e Titos". Dokumentet e reja, të publikuara nga Ministria e Drejtësisë e Shteteve të Bashkuara, tregojnë se financieri kishte marrë një email me 26 fotografi të kësaj prone, si dhe një prerje nga New York Post me titullin që për 50 milionë dollarë mund të bëhesh pronar i saj.
Më 10 dhjetor 2018, këshilltari financiar David Mitchell i dërgoi Epsteinit një email ku njoftonte për një zjarr në ndërtesë dhe sugjeronte se ishte momenti i duhur për një ofertë. Epstein më pas dërgoi një lidhje nga New York Post në dy adresa emaili, duke theksuar se çmimi duhej të ulej pas zjarrit.
Epstein nuk e bleu pronën. Ajo u shit katër vjet më vonë për 50 milionë dollarë. Serbisë i takuan 40 për qind e shumës sipas Aneksit B të Marrëveshjes për suksesionin e pasurisë së ish-Republikës Socialiste Federative të Jugosllavisë jashtë vendit, ndërsa 7.5 milionë dollarë iu takuan një shteti pasardhës.
Kontakti me Lajçakun
Gjatë kësaj periudhe, Epstein kontaktoi Miroslav Lajçakun, ish-Përfaqësuesin e Lartë në Bosnje dhe Hercegovinë. Më 25 tetor 2017, Epstein i dërgoi një SMS Lajçakut: "Shkova ta shoh ish-ambasadën jugosllave. Më thanë se është në shitje, por se të pesë qeveritë duhet të bien dakord, ajo serbe dhe të tjerat. Interesante".
Lajçak iu përgjigj: "Kurrë nuk do të bien dakord. Që nga viti 2001 po përpiqen të merren vesh për ndarjen e pasurisë dhe fundi nuk duket. Për gjithçka që lidhet me ish-Jugosllavinë ose shtetet pasardhëse aktuale, duhet të konsultohesh me mua, i njoh deri në thelb".
Këto detaje dalin nga dokumentet e fundit për Epsteinin, të cilat përmendin gjithashtu Lajçakun në kontekste të tjera.