Jeffrey Epstein, ish-financier amerikan, dyshohet se shkroi një shënim vetëvrasjeje para se të vdiste në burg në gusht 2019. Shënimi u gjet nga shoku i tij i qelisë, Nicholas Tartaglione, në korrik 2019, pas një incidenti ku Epstein u gjet pa ndjenja me një copë pëlhure rreth qafës. Ai i mbijetoi atij episodi, por disa javë më vonë u gjet i vdekur në qelinë e tij në një burg të Manhattanit.
Sipas The New York Times, shënimi, ku shkruhete „Është koha të themi lamtumirë”, ka mbetur i fshehtë për gati shtatë vite dhe është depozituar në një gjykatë në Nju Jork. Dokumenti u vulos nga një gjykatës federal si pjesë e procedurave penale ndaj Tartagliones, duke penguar aksesin e hetuesve që shqyrtonin vdekjen e Epsteinit. Kjo mund të ketë qenë një provë e rëndësishme për gjendjen e tij mendore.
The New York Times ka paraqitur një kërkesë në gjykatë për deklasifikimin e shënimit. Që nga dhjetori 2025, Departamenti i Drejtësisë i SHBAsë ka publikuar miliona faqe dokumentesh lidhur me çështjen Epstein, por shënimi nuk figuron në to. Një zëdhënëse e departamentit ka deklaruar se institucioni nuk ka qenë në dijeni të ekzistencës së këtij materiali.
Vdekja e Epsteinit, në moshën 66-vjeçare, u cilësua si vetëvrasje nga mjeku ligjor i Nju Jorkut. Mangësitë në sigurinë e burgut kanë nxitur debate dhe dyshime në opinionin publik për rrethanat e saj. Zbulimi i mundshëm i shënimit pritet të rihapë diskutimet mbi këtë çështje.