Një gjykatë federale në White Plains, New York, ka publikuar një letër supozuar vetëvrasjeje të Jeffrey Epstein-it. Dokumenti u bë publik të mërkurën nga gjykatësi Kenneth M. Karas, i cili mbikëqyrte çështjen penale të ish-shokut të qelisë së Epstein-it, Nicholas Tartaglione.
Tartaglione, ish-oficer policie akuzuar për vrasjen e katër personave, deklaroi se e kishte gjetur letrën në korrik 2019, brenda një libri grafik, pas një incidenti ku Epstein u gjet pa ndjenja me një copë pëlhure rreth qafës. Financieri mbijetoi atëherë, por u gjet i vdekur disa javë më vonë, në gusht 2019, në moshën 66-vjeçare, në qendrën e paraburgimit Metropolitan Correctional Center në Lower Manhattan, e cila tani është mbyllur. Vdekja e tij u cilësua zyrtarisht si vetëvrasje.
Letra, e pa datuar dhe me shkrim dorë të vështirë për t’u lexuar, nis me frazën: “Më hetuan për muaj të tërë — NUK GJETËN ASGJË!!!”. Ajo vazhdon: “Është privilegj të mund të zgjedhësh vetë momentin për t’i thënë lamtumirë” dhe “Çfarë doni të bëj — të shpërthej në lot!!”. Përfundon me “NJË TMERR. NUK IA VLEN!!”, me fjalët e fundit të nënvizuara.
The New York Times i kërkoi gjykatës heqjen e vulës së dokumentit të enjten e kaluar dhe publikoi një artikull me dëshminë e Tartaglione-s. Gazetari nuk ka verifikuar autenticitetin e letrës, e cila përmban shprehje si “shpërthej në lot” dhe “një tmerr”, të ngjashme me ato në email-et dhe një shënim tjetër të Epstein-it të gjetur në qeli pas vdekjes.
Epstein ishte arrestuar në korrik 2019 për trafikim të të miturve dhe akuzohej për vepra të ngjashme që datonin vite më parë. Ai kishte qenë i dënuar më herët, në 2008, për nxitje të prostitucionit të një të miture.