Erald Elezi, ish-drejtues i OSHEE-së, u paraqit sot në Prokurorinë e Posaçme Kundër Krimit të Organizuar dhe Korrupsionit (SPAK). Ai u mor i pandehur në kuadër të hetimeve për tenderin e tunelit të Llogarasë.
Në të njëjtën dosje është e pandehur edhe ish-zëvendëskryeministrja Belinda Balluku. Hetimet kanë filluar që vitin e kaluar dhe bazohen në materiale të sekuestruara nga celularët e të dyshuarve të tjerë.
SPAK ka nisur gjithashtu një hetim pasuror ndaj 25 të dyshuarve, mes të cilëve 22 persona fizikë dhe tre kompani. Në kohën e veprës së pretenduar, Elezi dhe Gentian Gjyli ishin anëtarë të Këshillit të Vlerësimit të Ofertave në varësi të Evis Berberit, ish-kreut të ARRSH-së.
Akuzat ndaj të dyshuarve përfshijnë korrupsionin, shpërdorimin e detyrës dhe shkeljen e barazisë në tenderë. Hetimet janë ende në proces dhe SPAK vazhdon të shqyrtojë të gjithë dokumentacionin përkatës.