Ministri i Mbrojtjes i Shqipërisë, Ermal Nufi, e ka konsideruar skandaloze dhe të papranueshme deklaratën e ministres serbe të Administratës Shtetërore dhe Vetëqeverisjes Lokale, Snezhana Paunoviq, e cila sugjeroi se do të kishte ndërmarrë spastrim etnik në Kosovë po të kishte qenë në vend të ish-liderit serb Millosheviq. Gjatë një konference për shtyp, Nufi theksoi se çdo lloj mbështetjeje apo heshtje përballë këtyre deklaratave është po aq vrastare.
Sipas ministrit, këto komente rikthejnë kujtime të dhimbshme nga periudhat e konflikteve të vitit 1999 në Kosovë, si dhe në Bosnje-Hercegovinë e ish-Jugosllavi. Ai nënvizoi se është në nderin e institucioneve të Serbisë që të distancohen publikisht nga qëndrimet e ministres Paunoviq dhe t’i dënojnë ato.
Ministri vlerësoi reagimet e qytetarëve dhe segmenteve të shoqërisë serbe, të cilët, sipas tij, kanë treguar distancim nga ky lloj nacionalizmi, duke mbajtur një qëndrim evropian që ne duam të shohim nga pala serbe. Ai shtoi se qeveria shqiptare mbetet e vendosur në qëndrimin e saj kundër çdo retorike që promovon dhunën ose spastrimin etnik.