Ministri i Mbrojtjes Ermal Nufi ka reaguar për 27-vjetorin e ndërhyrjes së NATO-s në Kosovë përmes një postimi publik.
Në reagimin e tij, Nufi e përshkruan ndërhyrjen si moment historik jo vetëm për kombin shqiptar, por edhe për ndërgjegjen e botës demokratike. Ishte akt vendosmërie për të ndalur një tragjedi humanitare dhe për të mbrojtur dinjitetin njerëzor përballë një regjimi që kishte zgjedhur dhunën dhe shkatërrimin.
Për faktorin shqiptar në rajon, kjo ndërhyrje ishte kthesë historike që konfirmoi të drejtën për të jetuar të lirë dhe në paqe. Ajo dëshmoi se vlerat perëndimore si liria, dinjiteti njerëzor dhe drejtësia nuk janë thjesht parime të shkruara, por angazhime që mbrohen me vendosmëri kudo që cenohen.
Kosova dhe institucionet e saj demokratike janë garancia më e fortë se vendimi i marrë 27 vite më parë ishte i duhuri. Me përkushtimin për t’u rritur përkrah aleatëve, ajo meriton të jetë shpejt në të gjitha tryezat dhe organizmat e arkitekturës euroatlantike.
Ngjarja mbetet kujtesë e fuqishme se paqja kërkon përkushtim të vazhdueshëm. NATO vijon të jetë garantuesi më i madh i sigurisë dhe stabilitetit në Ballkan dhe botë, duke qëndruar në vijën e parë të mbrojtjes së vlerave të përbashkëta.
Shqipëria mbetet e palëkundur në përkushtimin ndaj Aleancës. Kontributi ynë në misionet paqeruajtëse dhe mbrojtjen kolektive shpreh bindjen se siguria është përgjegjësi e përbashkët. Uniteti dhe solidariteti garantojnë që tragjedi të tilla të mos përsëriten më.