Ernest Muçi ka lënë grumbullimin e Kombëtares shqiptare në Valencia të Spanjës për shkak të një dëmtimi. Ai ndjeu shqetësim në pjesën e pasme të kofshës së djathtë të shtunën dhe iu nënshtrua një rezonance magnetike të dielën, e cila evidentoi një edemë muskulore që kërkon disa ditë pushim.
Pas konsultimit me stafin mjekësor, trajneri Sylvinho vendosi largimin e tij të parakohshëm. Muçi udhëtoi drejt Turqisë për të vazhduar rikuperimin te klubi i tij Trabzonspor dhe nuk do të jetë në dispozicion për ndeshjen miqësore ndaj Ukrainës më 31 mars në orën 20:45 në stadiumin Estadi Ciutat de València.
Në seancën stërvitore të dielën në qendrën sportive Parador de El Saler, ku kuqezinjtë stërvitën për rreth një orë me intensitet të plotë, nuk mori pjesë as mesfushori Jasir Asani. Ai ka pësuar një goditje në gjurin e djathtë gjatë stërvitjes së shtunës dhe stafi mjekësor po e monitoron gjendjen e tij. Nesër vlerësohet nëse do të rikthehet në stërvitje.
FSHF bëri të ditur këto zhvillime përmes departamentit të komunikimit. Ky është largimi i tretë nga grumbullimi pas Ylber Ramadanit dhe Arlind Ajetit. Në ndeshjen e fundit ndaj Polonisë, Muçi luajti vetëm 8 minuta si zëvendësues.
Përditësime
Ernest Muçi pritet të jetë gati për ndeshjen Trabzonspor–Galatasaray të fundjavës, sipas burimeve turke.
Vendimmarrje për Asanin sot, në vend të nesër.
Kombëtarja ka 22 lojtarë dhe nuk do të thërrasë të tjerë.
Sot në 17:00 konferencë shtypi me një lojtar; stërvitja e fundit në 18:00 në stadium përfshiu ushtrime fizike, veprime me top dhe ndeshje kontrolli.
Ardian Ismajli mungon ndeshjen ndaj Ukrainës për shqetësim muskulor në kofshën e majtë.
- Jasir Asani është rikuperuar plotësisht, stërvitet me grupin dhe është gati për ndeshjen.
- Stërvitja e fundit u zhvillua në stadium, me fokus taktik dhe ngarkesë fizike të ulët.