Pjesëtarë të Njësisë së Ndërhyrjes së Policisë së Specializuar (NJPS) të Misionit të Bashkimit Evropian për Sundimin e Ligjit në Kosovë (EULEX), në bashkëpunim me njësi të misionit KFOR të udhëhequr nga NATO, kanë zhvilluar ushtrime trajnimi për evakuim mjekësor ajror (Air MEDEVAC).
Ushtrimet u mbajtën më 4 shkurt në Kampin Bondsteel dhe përfshinë trajnime teorike dhe praktike. Sipas njoftimit zyrtar të EULEX-it, aktiviteti kishte për qëllim fuqizimin e bashkërendimit ndërmjet njësive dhe avancimin e gatishmërisë operacionale për reagim në raste emergjencash në situata reale.
Aktiviteti rrit aftësitë për menaxhimin e emergjencave dhe ndërhyrjen e shpejtë përmes evakuimit mjekësor ajror. EULEX-i thekson se ushtrime të tilla kontribuojnë në bashkëpunimin ndërinstitucional dhe garantimin e reagimit efikas e të koordinuar në terren.