Sipas të dhënave të Eurostat-it, jetëgjatësia mesatare në lindje në Bashkimin Europian në vitin 2024 ishte 81.5 vjet, me një rritje prej 0.1 vjet krahasuar me vitin 2023. Ky tregues kishte rënë në 80.4 vjet në 2020 dhe 80.1 vjet në 2021 për shkak të pandemisë së COVID-19, por ka rikuperuar dhe tejkaluar nivelin e vitit 2019 (81.3 vjet).
Për Shqipërinë, Eurostat raporton të dhëna për vitin 2022, kur jetëgjatësia mesatare ishte 79.1 vjeç. Të dhënat e INSTAT-it tregojnë rritje në rreth 80 vjeç në 2024, me gratë që pritet të jetojnë 82.5 vjeç dhe burrat 78.6 vjeç.
Krahasimi me rajonin
Në këto nivele, shqiptarët jetojnë më pak se mesatarja e BE-së dhe vendet e Europës Perëndimore e Veriore, por më gjatë se fqinjët. Ata tejkalojnë malazezit me 77.6 vjeç dhe serbët me 76.2 vjeç, të cilët renditen parafundit në Europë, pas bullgarëve me 75.8 vjeç. Të dhënat mungojnë për Kosovën dhe Maqedoninë e Veriut.
Diferencat brenda Shqipërisë
Në Shqipëri, veriu ka jetëgjatësinë më të ulët me 79.2 vjeç në 2022, krahasuar me 80.7 vjeç në qendër dhe 80.77 vjeç në jug. Aksesi më i ulët në shërbimet shëndetësore vlerësohet si një nga arsyet kryesore të kësaj dallimi.
Diferencat gjinore
Në BE, në 2024, gratë pritet të jetojnë 84.1 vjet (+0.1 vjet nga 2023), ndërsa burrat 78.9 vjet (+0.2 vjet), me një hendek prej 5.2 vjetësh. Ky hendek është më i madh në Letoni (9.8 vjet), Lituani (8.6 vjet) dhe Estoni (8.4 vjet).
Jetëgjatësia mesatare në lindje mat sa vite pritet të jetojë një person i lindur në një vit të caktuar, bazuar në normat aktuale të vdekshmërisë.