Aktivistja shqiptaro-amerikane Evi Kokalari ka bërë të ditur se ka dorëzuar kallëzim penal në SPAK kundër Sali Berishës, djalit të tij Shkëlzen Berisha, vajzës Argita Malltezi, deputetes Albana Vokshi dhe disa personave të tjerë.
Sipas deklaratës së saj, kallëzimi lidhet me pretendimin se Partia Demokratike u vu nën kontroll pas Kuvendit të 30 Prillit 2022 dhe u përdor për mbrojtjen e interesave personale si dhe për t’u përballur me hetimet e SPAK-ut.
Kokalari ka njoftuar gjithashtu se ka paraqitur padi civile me kërkesë për masë sigurimi, e cila është pranuar nga gjykata dhe synon pezullimin e Kuvendit të 23 Majit të partisë.
Ajo ka dërguar denoncim të detajuar edhe pranë zyrës së Sekretarit të Shtetit Marco Rubio dhe zyrtarëve të tjerë amerikanë, si dhe ka komunikuar me përfaqësues të Partisë Popullore Evropiane.
Kokalari ka deklaruar se qëllimi është izolimi i strukturës që kontrollon opozitën dhe ka shprehur gatishmëri për bashkëpunim me prokurorët e SPAK-ut.