Aktivistja shqiptaro-amerikane Evi Kokalari u përjashtua nga gara për kreun e Partisë Demokratike më 23 maj, pasi Komisioni i Zgjedhjeve vlerësoi se nuk plotësonte kriterin e anëtarësisë në parti.
Në një postim në Facebook, Kokalari publikoi një dokument që dëshmon pjesëmarrjen e saj në Kuvendin e PD-së në dhjetor 2021, ku figuron krahas deputetëve Albana Vokshi dhe Flamur Noka. Me këtë dokument, ajo pretendon se është anëtare e PD-së përmes "Rithemelimit" dhe do të drejtohet në gjyq për të kërkuar të drejtën e kandidimit të mohuar.
"Shihemi në gjyq, Sali Berisha!!", shkroi Kokalari.
Ajo pretendon se aplikimin e dorëzoi përmes mesazhit në WhatsApp, por u skualifikua. Më parë, Kokalari ka akuzuar Shkëlzen Berishën, djalin e Sali Berishës, se kriteret për kandidim u firmosën më 18 mars, por u bënë publike me vonesë.
Në selinë e PD-së, nuk iu pranua dosja fizike, ndonëse ajo e dërgoi elektronikisht.
Kandidatja tjetër e përjashtuar, Mereme Sela, ka paralajmëruar gjithashtu përballje në gjyq. Ndërsa deputeti Ervin Salianji deklaroi se do të ankohet pranë ndërkombëtarëve dhe PPE-së.