Faruk Jusufi u vra të shtunën në fshatin Bokshiq të Klinës, pas një fjalosjeje me vëllain, i cili dyshohet se e ka qëlluar me armë zjarri.
Zëdhënësi i policisë për rajonin e Pejës, Fadil Gashi, konfirmoi ngjarjen. "Rreth orës 15:10, policia u njoftua se, pas një fjalosjeje mes dy vëllezërve, njëri nga ta e qëlloi tjetrin me armë. Viktima u dërgua në emergjencën e Klinës e më pas u bart drejt Spitalit të Pejës. Pak para se të nisej në drejtim të QKUK-së për tretman mjekësor, viktima ndërroi jetë", tha Gashi.
Njësitë e policisë dhe të Prokurorisë kanë dalë në vendngjarje dhe po vazhdojnë procedurat hetimore.
Sfondi i viktimës
Faruk Jusufi kishte dhënë një intervistë për KosovaPress para pak ditësh, ku kishte folur për ndërprerjen e pensionit të veteranit të luftës. Ai i ishte bashkuar radhëve të Ushtrisë Çlirimtare të Kosovës si 20-vjeçar dhe e kishte gëzuar pensionin që nga paslufta. Pas punësimit në një ndërmarrje, pensioni i ishte ndërprerë. Për tre muaj arriti ta marrë sërish, ndërsa që nga shkurti pagesa nuk ishte ekzekutuar nga shteti.