Kryetari i NISMA-s, Fatmir Limaj, ka publikuar një video nga koha e luftës në të cilën shfaqet përkrah heroit të kombit, Tahir Sinani. Përmes këtij postimi, Limaj u ka bërë thirrje aktorëve politikë që të mos i përdorin vlerat dhe figurat që përbëjnë themelet e lirisë së Kosovës dhe të kombit shqiptar për qëllime të përplasjeve ditore.
"Mos prekni themelet e lirisë për interesa e përplasje ditore. Heroi i kombit, Tahir Sinani, i kthyer në frymëzim dhe simbol të qëndresës për çdo luftëtar të UÇK-së, është në themel të lirisë së kombit tonë", ka shkruar Limaj.
Sipas liderit të NISMA-s, figura e Sinanit nuk duhet të përfshihet në agjenda politike. Ky reagim është interpretuar si një kundërpërgjigje direkte ndaj kryeministrit të Shqipërisë, Edi Rama, dhe ministrit Taulant Balla, në lidhje me përdorimin e figurës së Tahir Sinanit në debatet e fundit politike. Limaj e ka përfunduar mesazhin e tij me nderime për sakrificën e dëshmorëve, duke theksuar se emri i Tahir Sinanit mbetet i paharruar në ndërgjegjen kombëtare.