Në Prishtinë u mbajt Akademia Përkujtimore me rastin e 25-vjetorit të rënies së komandantit Tahir Sinani. Ky është organizimi i parë zyrtar i këtij përvjetori nga institucionet qendrore të shtetit, përkatësisht nga Qeveria e Kosovës.
Kryeministri në detyrë, Albin Kurti, vlerësoi figurën e Sinanit si një ushtarak profesionist që iu bashkua Ushtrisë Çlirimtare të Kosovës (UÇK) në vitin 1998. Sipas Kurtit, Sinani nuk kontribuoi vetëm si luftëtar, por edhe si oficer, duke trajnuar qindra ushtarë të tjerë. Në fjalën e tij, Kurti theksoi përkushtimin e Sinanit, i cili refuzoi t'i mbivendosej zinxhirit komandues të ushtarëve që i kishte trajnuar vetë, duke këmbëngulur që fillimisht ta kalonte sprovën e përballjes me forcat armike serbe. Angazhimi i tij në luftën e Kosovës u përmbyll si komandant i Zonës Operative të Pashtrikut, ndërsa pas çlirimit të Kosovës, ai mori pjesë edhe në luftimet në Luginën e Preshevës dhe në Maqedoninë e Veriut me Ushtrinë Çlirimtare Kombëtare në vitin 2001.
Në emër të familjes, foli djali i komandantit, Rrezart Sinani, i cili vuri në dukje trashëgiminë morale që la pas babai i tij. Ai theksoi se nderimi më i lartë për dëshmorët është realizimi i idealit të tyre për një vend të fortë e të lirë dhe përçimi i vlerave të nderit e respektit tek brezat e ardhshëm.
Në akademi foli edhe ish-bashkëluftëtari Sadik Halitjaha, i cili e krahasoi Tahir Sinanin me heronjtë epikë të kombit shqiptar. Halitjaha rikujtoi rrugëtimin e Sinanit, duke filluar nga kontaktet e tij në qendrat e trajnimit në veri të Shqipërisë me komandantin Azem Syla, deri te hyrja në Kosovë bashkë me luftëtarë si Ruzhdi Kryeziu për krijimin e perimetrit të sigurisë.