Vajza e Heroit të Kombit Tahir Sinani, Rugova Sinani, ka shprehur indinjatën e saj të thellë pas publikimit të një dokumenti nga Taulant Balla. Sipas saj, dokumenti përmban një listë me emra të luftëtarëve të Ushtrisë Çlirimtare të Kosovës (UÇK), të cilët etiketohen si "mercenarë", ndërsa në krye të kësaj liste renditet emri i babait të saj.
Në reagimin e saj publik, Sinani ka akuzuar Ballën për përdhosje të figurës së dëshmorit dhe ka kërkuar falje publike. Ajo theksoi se Tahir Sinani, i cili ishte oficer i ushtrisë shqiptare dhe pjesëmarrës në tri luftëra çlirimtare në rajon, ka sakrifikuar jetën për lirinë e trojeve shqiptare. "Sot ti ma vrave për së dyti babën", ka shkruar ajo në reagimin e saj.
Përveç qëndrimit ndaj Ballës, ajo ka drejtuar kritika edhe ndaj Organizatës së Veteranëve të Luftës së UÇK-së. Sinani ka kërkuar që kjo organizatë të fokusohet në mbrojtjen e të drejtave të veteranëve, familjeve të dëshmorëve dhe vlerave të luftës. Ajo ka shtuar se, nëse drejtuesit aktualë nuk janë në gjendje ta bëjnë këtë, duhet të shpërbëhen dhe të zëvendësohen nga persona që vlerësojnë gjakun e dëshmorëve.