Një fenomen i rrallë atmosferik është regjistruar këtë të enjte në Ksamil, ku mbi sipërfaqen e detit është formuar një tornado. Pamjet e publikuara në rrjetet sociale tregojnë qartë vorbullën e ajrit që lidhet me retë e zeza, të cilat sinjalizonin përkeqësim të motit në zonë.
Sipas dëshmitarëve, fenomeni ka zgjatur disa minuta dhe është zhvilluar në një distancë të sigurt nga vija bregdetare, duke mos paraqitur rrezik për pushuesit apo infrastrukturën e plazheve.
Ekspertët shpjegojnë se këto formacione, të njohura si vorbulla detare, krijohen si pasojë e ndërveprimit të masave ajrore me temperatura dhe shkallë të ndryshme lagështie. Ky proces rezulton në krijimin e vorbullave mbi sipërfaqen e ujit, të cilat shpesh ngjajnë me tornadot tokësore.