Një tornado ka goditur zonën e Giannitsochorit në Ilia të Greqisë më 8 janar në mëngjes, duke përmbysur një makinë në rrugë. Ngjarja u regjistrua nga një kamerë sigurie dhe u publikua nga media greke Protothema.
Videoja tregon momentin kur era e fortë e ngriti dhe e përmbysi makinën brenda pak sekondash. Shoferi nuk ka pësuar lëndime. Tornadoja kaloi nëpër zonë për disa minuta, duke shkaktuar dëme në serra dhe duke shkëputur struktura hekuri.
Në një ngjarje të ngjashme, një tornado tjetër goditi një fermë shpendësh në Kalpaki të Janinës më 7 janar, duke rezultuar në ngordhjen e të paktën 30 mijë pulave.
Këto fenomene ndodhin në kontekstin e motit të keq që ka përfshirë rajonin e Ballkanit prej fillimit të javës. Në Shqipëri, Kosovë, Malin e Zi dhe Kroaci janë raportuar përmbytje nga shiu dhe bora, ndërsa në Greqi dhe Turqi era e fortë ka qenë më intensive.