Shoqata e Investitorëve të Huaj në Shqipëri (FIAA) ka publikuar Libri i Bardhë 2025-2029, ku vë në dukje se Shqipëria po humbet investime të mundshme drejt vendeve të tjera të rajonit për shkak të legjislacionit më pak të qëndrueshëm.
Sipas këtij publikimi, ndryshimet e shpeshta dhe të paparashikuara ligjore, veçanërisht në fushën fiskale, krijojnë një rrezik rregullator si taksë e padukshme. Kjo pengon investimet e reja dhe rrezikon zgjerimin nga investitorët ekzistues. Balazs Revesz, kryetari i FIAA, shpjegon se për investitorët ndërkombëtarë parashikueshmëria fiskale ka më shumë rëndësi se normat tatimore të ulëta, por të paqëndrueshme.
Libri i Bardhë nxit krijimin e një kalendari të qëndrueshëm fiskal dhe një dialogu institucional, ku zëri i biznesit dëgjohet para hyrjes në fuqi të ndryshimeve ligjore. Kjo vjen në një kohë kur Shqipëria ka hapur të gjithë kapitujt e negociatave me BE-në dhe synon të pozicionohet si destinacion konkurrues për investitorët e huaj.
Revesz nënvizon se kur rregullat ndryshojnë shpesh pa konsultim paraprak të strukturuar, kostoja nuk kufizohet vetëm në procedurat administrative. Libri i Bardhë 2025-2029 duhet të shihet nga qeveria si udhërrëfyes për partneritet strategjik.