FIFA ka zyrtarizuar afrimin e mbrojtësit Bujar Pllana në Kombëtaren shqiptare të futbollit. 24-vjeçari, i lindur në Mitrovicë, ka luajtur tre herë për përfaqësuesen U-21 të Kosovës, por nuk ka marrë pjesë në ndeshje zyrtare me ekipin e parë të Kosovës, çka i mundësoi lejen për këtë ndryshim.
Pllana luan te Lechia Gdańsk në Superligën polake, ku këtë sezon është aktivizuar në 11 ndeshje për 794 minuta në total. Ai pozicionohet si mbrojtës qendror dhe në krahun e djathtë. Më parë ka luajtur në Superligën e Kosovës te skuadrat Trepça ’89, Feronikeli ’74 dhe Prishtina. Në vitin 2023 kaloi te Slaven Belupo në Kroaci, para se të transferohej në Poloni, ku qëndron prej një viti e gjysmë.
Trajneri Silvinjo i ka dërguar ftesë Pllanës, ndërsa bisedimet për bashkëpunimin filluan në vitin 2023. Menaxheri i tij është ish-lojtari i Kombëtares Eros Grezda. Sipas burimeve, Pllana nuk është risia e vetme, pasi pritet të afrohet edhe mbrojtësi i majtë Stavros Pilios nga AEK-u i Athinës.
Ky afrim vjen në prag të ndeshjes play-off kundër Polonisë më 26 mars në Varshavë, e cila vendos për kalimin në finalen play-off për një biletë në grupet e Kupës së Botës 2026. Turneu do të zhvillohet nga 11 qershori deri më 19 korrik në SHBA, Meksikë dhe Kanada. Javën e ardhshme, Silvinjo pritet të publikojë listën e futbollistëve për këtë fazë.
Përditësime
Zhvillime të reja në play-off-et e kualifikuesve për Botërorin:
- Nëse Shqipëria fiton ndaj Polonisë më 26 mars, do të luajë ndaj fituesit të çiftit Ukrainë–Suedi më 31 mars.
- Stavros Pilios, 25-vjeçari, pranoi se dëshiron të luajë për Shqipërinë.
- FIFA sqaron strukturën e play-off-eve.