Ekipet e Inspektoratit të Komunës së Prishtinës, të mbështetur nga Policia e Kosovës dhe ekipe mjekësore, kanë nisur rrënimin e shtëpisë në zonën e Rrugës A, e cila paraqiste rrezik të lartë për shembje. Procesi ishte planifikuar më herët, mirëpo ishte shtyrë pasi pronari, Faruk Maxhuni, kishte refuzuar të lironte objektin.
Z. Maxhuni dhe bashkëshortja e tij kishin kundërshtuar rrënimin, duke pretenduar se dëmet në pronë ishin shkaktuar nga punimet për ndërtimin e objekteve të reja në lagje. Gjatë intervistimit në stacionin policor, Maxhuni pësoi një përkeqësim të gjendjes shëndetësore, për çka u desh ndërhyrja e emergjencës mjekësore. Gjendja e tij aktualisht raportohet si stabile.
Kryetari i Prishtinës, Përparim Rama, theksoi se objekti ishte ndërtuar pa leje në pronë komunale. Sipas tij, banorët e kësaj zone janë evakuuar para dy vitesh për shkak të punimeve dhe rrezikut nga rrëshqitja e dheut, ndërsa institucionet kanë vazhduar të mbulojnë shpenzimet e qirasë për familjet e evakuuara. Rama bëri thirrje për respektimin e ligjit mbi pronën komunale dhe kërkoi që qytetarët të mos i afrohen zonës, pasi mbetet e rrezikshme për shkak të punimeve.