Shërbimet e Komisariatit të Policisë në Peqin kanë finalizuar me sukses operacionin policor të koduar "Gjurmët", duke arrestuar dy shtetas të dyshuar për një sërë vjedhjesh në qarqet e Elbasanit dhe Peqinit. Të arrestuarit janë identifikuar si Glendon Ymeri, 34 vjeç, dhe Florenc Janku, 37 vjeç, të dy banues në Elbasan.
Sipas njoftimit zyrtar të policisë, të dyshuarit, në bashkëpunim me njëri-tjetrin, kanë kryer vjedhje në banesa, biznese dhe automjete, duke përvetësuar shuma parash dhe sende me vlerë. Hetimet paraprake kanë dokumentuar 4 raste vjedhjeje, ku tre prej tyre janë regjistruar gjatë javës së fundit. Gjatë operacionit, autoritetet kanë sekuestruar një automjet të marrë me qira, i cili dyshohet se shërbente për lëvizjen e autorëve gjatë kryerjes së veprimtarisë kriminale.
Po ashtu, në cilësinë e provës materiale janë gjetur dhe sekuestruar mjete të ndryshme që përdoreshin për hapjen e dyerve, qepenave dhe bravave, si dhe veshje që autorët dyshohet se kanë mbajtur gjatë kryerjes së vjedhjeve. Materialet procedurale i janë përcjellë Prokurorisë pranë Gjykatës së Shkallës së Parë të Juridiksionit të Përgjithshëm Elbasan për hetime të mëtejshme mbi veprën penale "Vjedhja", kryer në bashkëpunim. Policia po vijon punën për dokumentimin e plotë të veprimtarisë kriminale dhe zbardhjen e rasteve të tjera të mundshme.