Specialistët e Seksionit për Hetimin e Trafiqeve pranë Drejtorisë Vendore të Policisë së Elbasanit kanë finalizuar dy faza të tjera të operacionit policor të koduar "Aksi". Ky operacion synon goditjen e veprimtarisë kriminale të dhënies së ndihmës për kalim të paligjshëm të kufirit, kundrejt përfitimit ekonomik.
Gjatë këtyre fazave, janë arrestuar në flagrancë dy të rinj, të cilët po transportonin 8 shtetas nga vendet e treta, të cilët kishin hyrë ilegalisht në territorin e Shqipërisë. Konkretisht, në fazën e katërt të operacionit, të koduar "Aksi 4", u ndalua shtetasi L. L., 23 vjeç, banues në Shkozet. Në fazën e pestë, të koduar "Aksi 5", u ndalua shtetasi E. M., 20 vjeç, banues në Durrës.
Në cilësinë e provës materiale, policia ka sekuestruar dy automjetet që shërbenin për transportimin e emigrantëve. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Elbasan për veprime të mëtejshme. Ndërkohë, uniformat blu vijojnë hetimet për të dokumentuar plotësisht veprimtarinë kriminale dhe për të identifikuar persona të tjerë që mund të jenë të përfshirë në këtë rrjet transporti.