Specialistët e Seksionit për Hetimin e Trafiqeve pranë Drejtorisë Vendore të Policisë Elbasan finalizuan me sukses operacionin policor të koduar “Rrjeta 2”. Gjatë ndërhyrjes në aksin rrugor Elbasan-Peqin, uniformat blu ndaluan një automjet, brenda të cilit po udhëtonte shtetasi A. A., 31 vjeç. Gjatë kontrollit, u konstatua se 31-vjeçari po transportonte 7 shtetas të huaj nga vendet e treta, të cilët dyshohet se kishin hyrë në mënyrë të paligjshme në territorin e Republikës së Shqipërisë.
Në vijim të veprimeve procedurale, u bë arrestimi në flagrancë i shtetasit A. A., ndërsa bashkëpunëtori i tij, shtetasi M. K., 25 vjeç, u shpall në kërkim. Sipas autoriteteve, automjeti i përdorur për transportimin e emigrantëve ishte në pronësi të 25-vjeçarit të shpallur në kërkim. Mjeti është sekuestruar nga policia në cilësinë e provës materiale.
Shtatë shtetasit e huaj janë shoqëruar për të kryer procedurat e nevojshme administrative. Ndërkohë, grupi hetimor vijon punën për dokumentimin e plotë të kësaj veprimtarie kriminale, identifikimin e personave të tjerë që mund të jenë të përfshirë dhe kapjen e M. K. Materialet procedurale i janë referuar Prokurorisë për veprën penale “Ndihma për kalim të paligjshëm të kufirit”, kryer në bashkëpunim.