Policia e Shtetit finalizoi dy operacione të njëpasnjëshme, të koduara përkatësisht "Aksi" dhe "Aksi 01", në aksin rrugor Librazhd–Elbasan. Si pasojë e këtyre ndërhyrjeve, u arrestuan tre persona të cilët po transportonin emigrantë nga vendet e treta, me qëllim kalimin e paligjshëm të tyre drejt vendeve të Bashkimit Evropian.
Në operacionin e parë, të koduar "Aksi", policia arrestoi në flagrancë shtetasin Florjan Mustafa, 22 vjeç, banues në Elbasan, i cili po transportonte 14 emigrantë. Në operacionin e dytë, të koduar "Aksi 01", u ndaluan shtetasit Aleksandër Rira, 23 vjeç dhe Denis Çollaku, 24 vjeç, të dy banues në Përrenjas, të cilët po transportonin 10 emigrantë të tjerë.
Hetimet paraprake konfirmuan se transporti kryhej kundrejt pagesave. Gjatë verifikimeve të kryera nga shërbimet e Seksionit për Hetimin e Trafiqeve, në bashkëpunim me Forcën e Posaçme Operacionale dhe forcën "Shqiponja", rezultoi se 23-vjeçari Aleksandër Rira drejtonte automjetin pa leje përkatëse.
Në cilësinë e provës materiale, policia sekuestroi dy automjetet e përdorura për këtë veprimtari. Materialet procedurale i janë kaluar për veprime të mëtejshme Prokurorisë pranë Gjykatës së Shkallës së Parë të Juridiksionit të Përgjithshëm Elbasan.