Policia e Elbasanit finalizoi dy operacione të njëpasnjëshme kundër dhënies së ndihmës për kalim të paligjshëm të kufirit, duke vënë në pranga tre persona që po transportonin emigrantë drejt vendeve të Bashkimit Evropian. Operacionet u zhvilluan nga Seksioni për Hetimin e Trafiqeve, në bashkëpunim me Forcën e Posaçme Operacionale dhe Forcën e Posaçme "Shqiponja", në aksin rrugor Librazhd–Elbasan.
Sipas njoftimit zyrtar të policisë, arrestimet u kryen në dy raste të ndara:
• Operacioni i koduar "Aksi": U arrestua në flagrancë Florjan Mustafa, 22 vjeç, banues në Elbasan, i cili po transportonte 14 emigrantë.
• Operacioni i koduar "Aksi 01": U arrestuan Aleksandër Rira, 23 vjeç, dhe Denis Çollaku, 24 vjeç, të dy banues në Përrenjas, të cilët u kapën duke transportuar 10 emigrantë.
Nga verifikimet e kryera, rezultoi se shtetasi Aleksandër Rira drejtonte automjetin pa leje drejtimi. Në kuadër të këtyre operacioneve, policia sekuestroi 2 automjete të përdorura për transportimin e emigrantëve. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Elbasan për veprime të mëtejshme hetimore.