Shërbimet e Komisariatit të Policisë Elbasan, në bashkëpunim me Sektorin e Qarkullimit Rrugor, finalizuan operacionin policor të koduar “Kamuflimi” në fshatin Bradashesh.
Si rezultat, u kap në flagrancë dhe u arrestua shtetasi E. E., 32 vjeç, banues në Peqin. Ai drejtonte një automjet tip Audi, në pjesën e përparme të të cilit kishte vendosur fenelina të ngjashme me ato të Policisë së Shtetit, për të u kamufluar si mjet zyrtar dhe për të shmangur kontrollet policore.
Gjatë kontrollit në automjet, policia gjeti një armë zjarri pistoletë me fishekë, e fshehur poshtë pjesës së timonit në një dhomë sekrete. U sekuestruan si prova materiale arma, fenelina dhe automjeti.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Mbajtja pa të drejtë e uniformës”.
Policia e Shtetit thekson se do të vazhdojë kontrollet intensive për parandalimin e paligjshmërive që cenojnë rendin dhe sigurinë publike.