Një 32-vjeçar me inicialet D. K., banues në fshatin Perondi të Kuçovës, u arrestua nga Policia e Elbasanit pas një tentative për të marrë me forcë në automjet një 39-vjeçare në ambientet e jashtme të një karburanti në Librazhd.
Ngjarja ndodhi në kuadër të operacionit të koduar “Insistimi”. Hetimet treguan se i dyshuari e kishte përndjekur viktimën prej një viti e gjysmë. Gjatë incidentit, ai goditi me grushte mashkullin që shoqëronte gruan dhe u largua nga vendngjarja.
Policia intervemoi menjëherë pas njoftimit për konfliktin mes disa shtetasve. I dyshuari u kap në hyrje të qytetit të Elbasanit, ndërsa drejtonte automjetin në gjendje të dehur. U sekuestruan automjeti dhe celulari i tij.
Materialet procedurale iu dorëzuan Prokurorisë së Elbasanit për veprime të mëtejshme ligjore.