Specialistët për Hetimin e Narkotikëve në Drejtorinë Vendore të Policisë Elbasan, në bashkëpunim me Forcën e Posaçme "Shqiponja", finalizuan operacionin policor të koduar "Bulevardi". Ky operacion goditi veprimtaritë kriminale në fushën e shpërndarjes së lëndëve narkotike.
Në flagrancë u arrestua shtetasi F. P., 37 vjeç, banues në Elbasan, i dyshuar për veprat penale "Prodhim dhe shitje të narkotikëve" dhe "Prodhim, mbajtje ose shitje pa leje të armëve të ftohta". Gjithashtu u arrestua L. Xh., 34 vjeç, banues në Elbasan, i dyshuar për "Moskallëzim krimi". Ky i fundit ka precedent penal në fushën e narkotikëve.
Të arrestuarit u kapën në bulevardin "Qemal Stafa", ndërsa udhëtonin me automjetin tip Mercedes Benz, me drejtues F. P. dhe pasagjer L. Xh..
Gjatë kontrollit të automjetit u sekuestruan lëndë narkotike kokainë dhe kanabis të ndara në doza gati për shitje, një shkop metalik, 3 aparate celularë, vetë automjeti dhe një shumë parash në euro dhe lekë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan për hetime të mëtejshme.