Gjatë një operacioni policor të koduar “Shitblerja”, forcat e rendit kanë goditur një vatër të shpërndarjes së lëndëve narkotike në Elbasan. Aksioni u realizua nga specialistët e Seksionit për Hetimin e Narkotikëve, në bashkëpunim me Seksionit për Mbështetjen Operacionale të Hetimit dhe Forcën e Posaçme “Shqiponja”, nën drejtimin e Prokurorisë.
Në banesën e 40-vjeçarit K. N., i cili është shpallur në kërkim pasi nuk u gjet në momentin e ndërhyrjes, policia sekuestroi 1 kilogram e 130 gramë lëndë të dyshuar narkotike Cannabis Sativa, e ndarë pjesërisht në doza gati për shitje. Gjithashtu, në cilësinë e provës materiale u gjetën një peshore elektronike, një armë gjahu pa leje, 71 700 lekë dhe 100 euro.
Në lidhje me këtë operacion janë proceduar në gjendje të lirë dy shtetas:
- B. D., 37 vjeç, i cili u kap në afërsi të banesës së shtetasit në kërkim me një armë të ftohtë (thikë) dhe dyshohet se po shkonte për të blerë lëndë narkotike.
- A. S., 20 vjeç, i cili u kap po ashtu në afërsi të vendngjarjes me një sasi kanabisi me vete, për të cilën dyshohet se ishte blerë nga K. N.
Materialet procedurale janë referuar në Prokurorinë e Elbasanit për veprime të mëtejshme, ndërsa vijon puna për lokalizimin dhe kapjen e 40-vjeçarit.