Një operacion antidrogë u zhvillua mbrëmjen e së martës në Elbasan, duke çuar në arrestimin e tre personave të dyshuar për trafikim lëndësh narkotike. Aksioni u realizua nga Drejtoria Vendore e Policisë Elbasan në bashkëpunim me Drektorinë Vendore të Policisë Shkodër dhe u finalizua pranë mesnatës në një zonë periferike të qytetit, sipas burimeve policore dhe gazetarit Fatmir Popja.
Policia ndoqi një automjet të dyshuar për transport droge. Në hyrje të Elbasanit, drejtuesi i mjetit tentoi të arratiset me shpejtësi, duke u futur në një rrugë të pandriçuar në një lagje periferike, si Bradashesh sipas një burimi. Forcat e rendit rrethuan zonën, neutralizuan mjetin dhe arrestuan tre personat brenda tij në flagrancë.
Gjatë kontrollit të automjetit u sekuestruan 45 kilogramë kanabis sativa, një armë zjarri luftarake me municion, një sasi e konsiderueshme parash dhe disa telefona celularë me karta SIM shqiptare dhe të huaja.
Një punonjës policie mbeti i lënduar lehtë aksidentalisht nga thyerja e një xhami dhe ndodhet jashtë rrezikut për jetën.
Hetimet vijojnë për zbardhjen e plotë të rastit. Dyshohet se grupi kriminal ka shtrirë aktivitetin në të paktën tre qarqe të vendit dhe po kërkohen persona të tjerë të përfshirë. Policia nuk ka dhënë ende një deklaratë zyrtare për mediat.
Përditësime
Policia e Shtetit ka identifikuar të arrestuarit në operacionin 'Jug & Veri': Arben Guçe (31), Elion Qeva (29), Fran Pjetra (35) dhe Mark Muraca (31, nga Shkodra).
Katër persona të arrestuar pas hetimesh disa javorësh me metoda speciale, nën drejtimin e Prokurorisë së Elbasanit.
Janë sekuestruar 41 kg kanabis, një kallashnikov me 32 fishekë, 2 automjete dhe 2 celularë.
- Automjeti me armë drejtohej nga Guçe dhe Qeva.
- VW Golf me drogë drejtohej nga Pjetra, në drejtim të PKK Qafë Thanë.
Guçe dëmtoi një mjet policie gjatë kundërshtimit.
Operacioni synon trafikun e drogës nga veriu në jug për eksport.
DVP Elbasan njoftoi detajet zyrtare të operacionit 'Jug & Veri', ku Mark Muraca bashkëpunoi duke vënë në dispozicion automjetin e tij për Fran Pjetra. Operacioni u krye nga Seksioni për Hetimin e Narkotikëve, në bashkëpunim me Forcën e Posaçme Operacionale dhe Seksionin për Mbështetjen Operacionale të Hetimit.