Policia e Elbasanit finalizoi operacionin e koduar “Streha”, si rezultat i një hetimi me metoda proaktive, në mbikëqyrjen e Prokurorisë së Elbasanit. Specialistët e strukturave hetimore të Drejtorisë Vendore të Policisë Elbasan, në bashkëpunim me seksionet për Hetimin e Trafiqeve dhe Mbështetjen Operacionale, dokumentuan me prova ligjore veprimtaritë kriminale në një objekt 3-katësh në lagjen “Visarjon Xhuvani”.
Gjatë ndërhyrjes, u arrestuan në flagrancë shtetaset e huaja nga Kolumbia dhe Republika Domenikane: B. M. (35 vjeçe), D. G. (27 vjeçe), L. M. (25 vjeçe) dhe J. B. (33 vjeçe). Nga hetimi rezultoi se ato ushtronin prostitucion në objekt dhe shisnin lëndë narkotike kokainë dhe Cannabis Sativa shtetasve që përfitonin nga këto veprimtari.
U sekuestruan 0.5 kg lëndë narkotike Cannabis Sativa, 35.3 g lëndë narkotike kokainë, shuma parash, armë sportive, celularë dhe sende të tjera që lidhen me veprimtaritë kriminale. Gjithashtu, u identifikua organizatori A. T. (56 vjeç), i cili u shpall në kërkim; policia vijon punën për kapjen e tij.
Materialet procedurale iu referuan Prokurorisë së Elbasanit për veprime të mëtejshme. Hetimet vazhdojnë për zbardhjen e plotë të rrjetit kriminal.