Specialistët e Seksionit për Mbështetjen Operacionale të Hetimit, në bashkëpunim me shërbimet e komisariateve të Policisë në Shijak dhe Kavajë, kanë finalizuar operacionin policor të koduar "Implikimi". Ky aksion kishte si qëllim lokalizimin dhe kapjen e dy shtetasve të shpallur në kërkim ndërkombëtar nga drejtësia italiane dhe ajo spanjolle.
Shtetasi Enkelet Avduli, 46 vjeç, u arrestua teksa po lëvizte me automjet në aksin rrugor Rrogozhinë–Peqin. Ndaj tij rëndojnë akuzat për trafikim të lëndëve narkotike, armëmbajtje pa leje dhe kanosje, për të cilat është dënuar nga Gjykata e Apelit e Bolonjës, në Itali.
Në të njëjtën kohë, policia ndaloi në fshatin Sukth i Ri shtetasin S. K., 38 vjeç. Ndalimi i tij u krye pasi autoritetet gjyqësore në Madrid, Spanjë, kishin caktuar masën e sigurisë "Arrest në burg" për veprat penale të trafikimit të lëndëve narkotike dhe pjesëmarrjes në organizatë kriminale.
Interpol Tirana, në bashkëpunim me autoritetet italiane dhe spanjolle, vijon procedurat për ekstradimin e dy të arrestuarve drejt vendeve përkatëse.
Përditësime
Në kuadër të operacionit policor "Implikimi", autoritetet kanë identifikuar njërin prej dy personave të arrestuar, i cili ishte shpallur në kërkim ndërkombëtar: Sadik Kasa.