Policia e Tiranës ka finalizuar me sukses operacionin e koduar Vendtakimi, pas kontrolleve të ushtruara në një lokal në bulevardin Zhan d'Ark. Operacioni u zhvillua nga specialistët e Seksionit për Hetimin e Mashtrimeve Kibernetike në bashkëpunim me Forcën e Posaçme Operacionale.
Në pranga kanë rënë dy shtetas: pronari i lokalit, Zyfer Topulli, 56 vjeç, dhe Gerard Ereqi, 33 vjeç. Sipas njoftimit zyrtar, 56-vjeçari dyshohet se e kishte përshtatur biznesin e tij për përdorim dhe shitje të lëndëve narkotike, si dhe për organizimin e lojërave të fatit në kundërshtim me ligjin.
Shtetasi Gerard Ereqi u kap në flagrancë nga shërbimet e policisë brenda ambientit të lokalit, teksa po vendoste baste sportive përmes aparatit të tij celular. Gjatë kontrollit, policia sekuestroi në cilësinë e provës materiale një sasi të lëndës së dyshuar narkotike Cannabis Sativa dhe 3 telefona celularë që përdoreshin për veprimtarinë e paligjshme.
Materialet procedurale i janë referuar Prokurorisë së Tiranës, e cila po vijon hetimet për zbardhjen e plotë të rrethanave të ngjarjes dhe përgjegjësitë e personave të përfshirë.