Policia e Tiranës finalizon operacionin Segmenti, 14 në pranga

Policia e Tiranës ka finalizuar operacionin e koduar “Segmenti”, duke çmontuar rrjete të shpërndarjes së lëndëve narkotike në kryeqytet, me një bilanc që është rritur ndjeshëm pas hetimeve të thelluara. Në total, janë identifikuar 52 persona të përfshirë në këtë veprimtari kriminale, ndërsa masa e sigurisë “arrest në burg” është ekzekutuar për 31 prej tyre, një shtetase është nën masën “arrest shtëpie” dhe 14 persona janë shpallur në kërkim. Ky operacion u finalizua pas një hetimi tre-mujor të kryer nga Sektori për Hetimin e Narkotikëve në DVP Tiranë, në bashkëpunim me Prokurorinë.

Hetimet dokumentuan se pjesëtarët e këtyre grupeve kriminale ushtronin aktivitetin e paligjshëm në zona të ndryshme të kryeqytetit, me fokus pranë shkollave 9-vjeçare dhe të mesme, ku veçohen gjimnazet “Partizani” dhe “Çajupi”. Grupet kriminale përdornin metoda të sofistikuara për shpërndarje, duke shfrytëzuar monopatina, taksi dhe shërbime delivery për të shmangur vëmendjen e policisë. Disa prej të dyshuarve shfrytëzonin gjithashtu ambiente private, siç është një lokal në zonën e Medresesë, për aktivitetin e tyre, ndërsa agjentët kanë përdorur metoda speciale si blerjet e stimuluara.

Në mesin e të arrestuarve janë identifikuar Artur Meta dhe Rubin Meta, të cilët dyshohet se drejtonin një prej grupeve dhe shërbenin si furnizues kryesorë. Policia raportoi sekuestrimin e një arsenali të gjerë, i cili përfshin:

• Sasi të konsiderueshme heroinë, kokainë dhe kanabis;
• 90 fishekë dhe një armë zjarri pistoletë;
• 12 automjete dhe 35 telefona celularë;
• 2.3 milionë lekë të rinj;
• Pajisje për lojëra fati, duke përfshirë dy tavolina pokeri, fisha dhe çipsa.

Ky aksion është pjesë e një strategjie më të gjerë kundër narkotikëve, e cila në faza të mëparshme kishte çuar në arrestimin e 7 personave të tjerë. Materialet procedurale janë dërguar pranë organit të akuzës për hetime të mëtejshme mbi të gjithë të përfshirët në këtë rrjet kriminal.