Fisnik Asllani, sulmuesi i Kombëtares së Kosovës, foli pas stërvitjes para finales së play-off-it për kualifikimin në Botërorin 2026 kundër Turqisë, e cila zhvillohet të martën në stadiumin Fadil Vokrri në Prishtinë nga ora 20:45.
Ai u shpreh se fitorja e fundit në Bratisllavë kundër Sllovakisë ka dhënë shumë vetëbesim skuadrës. “Fitorja na ka dhënë shumë vetëbesim. Të martën kundër Turqisë shpresoj se do ta bëjmë një lojë shumë të mirë. Shpresojmë që ta fitojmë këtë lojë dhe të shkojmë në Botërorin 2026”, deklaroi Asllani.
I pyetur për faktin se Turqia konsiderohet favorite, sulmuesi u tregua i prerë. “Kjo punë për vete nuk më intereson, s’besoj as ekipit që i intereson. Në fund shihet në fushë. Favorit ka qenë edhe Sllovakia edhe Suedia, kështu që ne kemi me kry punën tonë, kemi me dhënë maksimumin në fushë”, tha ai.
Asllani kërkoi gjithashtu përkrahje nga tifozët. “I lus fansat të na ndihmojnë sa të munden, e edhe ne kemi me bë maksimumin për ta. Bashkë me ta, ata bashkë me neve”, përfundoi ai.