Sulmuesi i përfaqësueses së Kosovës, Fisnik Asllani, ka reaguar pas finales kundër Turqisë, e cila përfundoi me humbjen e ngushtë të vendasve. Ndeshja, e zhvilluar në stadiumin Fadil Vokrri, u vendos nga një gol i vetëm, pavarësisht angazhimit të lartë dhe rasteve për shënim të krijuara nga lojtarët e Kosovës.
Përmes një postimi në rrjetet sociale, Asllani e përshkroi rezultatin si një ëndërr të ndërprerë pak para fundit, duke theksuar se skuadra besoi deri në çastet e fundit të takimit. "Nuk është veç një humbje, është një ëndërr që u ndal pak para fundit. E dhamë shpirtin, besuam deri në sekondën e fundit, por fati nuk ishte në anën tonë", ka shkruar ai.
Duke reflektuar mbi rëndësinë e ndeshjes, futbollisti shtoi se zhgënjimi është i madh për shkak të afërsisë me një arritje historike, por shprehu optimizëm për vazhdimësinë e ekipit. "Dhimbja është e madhe, sepse e dinim sa afër ishim historisë, sa afër një momenti që do mbetej përgjithmonë. Por ne jemi Kosova dhe do të kthehemi më të fortë! Faleminderit Kosovë", përfundoi mesazhi i tij drejtuar tifozëve.