Ministrja e Mjedisit dhe Planifikimit Hapësinor, Fitore Pacolli, ka reaguar pas sulmit ndaj shtëpisë së familjes Berisha në Zveçan. Ajo e ka dënuar ashpër këtë ngjarje, duke e cilësuar si një akt barbar që ka për qëllim të krijojë frikë dhe pasiguri te familjet shqiptare që po rikthehen për të jetuar në pronat e tyre në veri të vendit.
Sipas Pacollit, familja Berisha është përfituese e projektit të Qeverisë së Republikës së Kosovës për rindërtimin dhe renovimin e shtëpive. Ministrja deklaroi se sulme të tilla synojnë të pengojnë politikat shtetërore që garantojnë të drejtën e qytetarëve për rikthim. Ajo theksoi se këto veprime nuk do ta ndalin kthimin e qytetarëve dhe as zbatimin e këtij programi qeveritar.
"Këto sulme qyqare nuk do të ndalin as kthimin e familjeve dhe as zbatimin e projektit. Ministria e Mjedisit dhe Planifikimit Hapësinor do të vazhdojë me përkushtim realizimin e këtij programi, në çdo pjesë të Republikës së Kosovës," ka deklaruar ajo përmes një reagimi në rrjetet sociale. Pacolli u ka bërë thirrje organeve kompetente që të ndërmarrin hapat e nevojshëm për zbardhjen e rastit sa më parë dhe sigurimin e përballjes së autorëve me drejtësinë.