Ministrja në detyrë e Mjedisit, Planifikimit Hapësinor dhe Infrastrukturës, Fitore Pacolli, ka zhvilluar sot një inspektim në punimet e Projektit të Banimit të Përballueshëm dhe Social në Podujevë. Gjatë kësaj vizite, ministrja evidentoi ngecje në ecurinë e punimeve dhe zhvilloi një takim të drejtpërdrejtë me përgjegjësin e kompanisë kontraktuese.
Në deklaratën e saj për mediat, Pacolli bëri të ditur se vonesat në realizimin e projektit janë të papranueshme. Ajo nënvizoi se të gjitha punimet duhet të përfundojnë konform afateve të përcaktuara në kontratat përkatëse.
"Projektet duhet të realizohen brenda afateve të përcaktuara me kontratë. Për kompanitë që nuk i përmbushin obligimet dhe afatet do të shqiptohen gjoba. Do të jemi të pakompromis me kompanitë e papërgjegjshme," deklaroi Pacolli. Ky inspektim pasqyron angazhimin e Ministrisë për të monitoruar zbatimin e projekteve publike dhe për të siguruar llogaridhënie nga operatorët ekonomikë në nivel lokal.