Ministrja e Mjedisit dhe Planifikimit Hapësinor, Fitore Pacolli, bashkë me zëvendësin Avni Zogiani dhe Inspektoratin Mjedisor, vizituan sot pellgun ujor të lumit Lepenc. Qëllimi ishte vlerësimi nga afër i procesit të kontrollit dhe inspektimit të hidrocentraleve, si dhe i zbatimit të legjislacionit në fuqi për mbrojtjen e mjedisit dhe resurseve ujore.
Sipas një njoftimi të Ministrisë së Mjedisit dhe Planifikimit Hapësinor, vizita verifikoi nëse aktiviteti i operatorëve zhvillohet në përputhje me lejet mjedisore e ujore, si dhe me standardet teknike dhe ligjore.
"Njëri prej sektorëve që i mbulon Ministria dhe që është jashtëzakonisht i rëndësishëm, si dhe pjesë e prioritetit tonë, janë ujërat. Do të fokusohemi që ujërat e shtetit të Kosovës të shfrytëzohen në mënyrën më të qëndrueshme të mundshme, pra të mos keqshfrytëzohen dhe të mos keqmenaxhohen. Mbrojtja e lumenjve dhe mbrojtja e ujërave të Kosovës është fokusi ynë kryesor", tha Pacolli.
Ministrja theksoi se kurrkush nuk duhet t’i keqshfrytëzojë ujërat, duke i cilësuar ato prioritet në mandatin qeverisës.