Fitore Pacolli, ministre e Mjedisit dhe Planifikimit Hapësinor, reagoi në Facebook për shembjen e rrugës “Don Shtjefën Kurti” në Prishtinë.
Ajo e cilësoi ngjarjen si pasojë të drejtpërdrejtë të neglizhimit të standardeve ndërtimore dhe mungesës së respektimit të kritereve teknike e ligjit gjatë viteve. Respektimi i tyre është jetik për mbrojtjen e jetës së qytetarëve, punëtorëve dhe stabilitetin e infrastrukturës, sipas deklaratës së saj.
Pacolli paralajmëroi llogaridhënie të plotë e të panegociueshme ndaj të gjitha palëve përgjegjëse, përfshirë komunat për mungesën e inspektimit të duhur dhe moszbatimin e standardeve në ndërtim.
Pavarësisht rezistencës nga grupet e interesit dhe politikave të mëparshme pa llogaridhënie, Ministrja premtoi vendosjen e rendit dhe rregullit. Për të dhënë fund improvizimeve të tilla, ajo njoftoi përpjekje për kritere të rrepta përmes Planit të ri Hapësinor të Kosovës.
Ngjarja në Prishtinë, përfshirë zona si Veternik, ka ngritur shqetësime për sigurinë në sektorin e ndërtimit.