Në Kuvendin Zgjedhor të X-të të degës së AAK-së në Gjakovë, Flamur Fetahaj u zgjodh kryetar i degës.
Ramush Haradinaj, kryetar i Aleancës për Ardhmërinë e Kosovës (AAK), ka njoftuar zgjedhjen përmes një postimi në Facebook. Ai vlerësoi Gjakovën si qytet të dijes, kulturës dhe atdhedashurisë, ku qytetarët për shumë mandate i kanë besuar AAK-së udhëheqjen e komunës.
Haradinaj theksoi se nën drejtimin e kryetarit të Komunës Ardian Gjini, Gjakova ka fituar dinjitetin e një qyteti që zhvillohet me punë, përkushtim dhe rezultate konkrete. Investimet e shumta, projektet transformuese dhe qasja e drejtë ndaj çdo qytetari e kanë kthyer qytetin në model të mirëqeverisjes lokale dhe zhvillimit të qëndrueshëm.
Kjo mbështetje e fuqishme u konfirmua në kuvend, ku u zgjodhën strukturat e reja drejtuese. Flamur Fetahaj, aktualisht nënkryetar i komunës, është kuadër i dëshmuar dhe i përkushtuar, që shquhet për angazhimin ndaj qytetarëve.
Haradinaj shprehu mirënjohje ndaj Ardian Gjinit, kryetar i deritanishëm i degës, dhe strukturave që kanë dhënë kontribut për ta mbajtur AAK-në forcë të parë politike në Gjakovë.
Në fund, ai uroj mbarëvajtje dhe suksese Flamur Fetahajt si dhe strukturave të reja në përmbushjen e detyrave.