Revista prestigjioze amerikane Forbes ka publikuar një listë me 96 destinacione botërore, të cilat ofrojnë kushte të favorshme për shtetasit që dëshirojnë të kalojnë vitet e pensionit jashtë Shteteve të Bashkuara. Shqipëria është vlerësuar si një ndër vendet më tërheqëse falë një kombinimi mes kostos së përballueshme të jetesës, e cila është shumë më e ulët se mesatarja amerikane, dhe bukurive natyrore të vendit.
Sipas analizës së Forbes, faktorët kyç që e bëjnë vendin tonë të përshtatshëm përfshijnë klimën mesdhetare, nivelin e ulët të kriminalitetit dhe stabilitetin qeveritar. Për sa i përket sistemit shëndetësor, revista vëren se ai është i përshtatshëm dhe në proces përmirësimi, ndërsa thekson domosdoshmërinë e sigurimit shëndetësor privat.
Procedurat dhe integrimi
Artikulli evidenton se marrja e lejes së qëndrimit në Shqipëri është relativisht e lehtë. Pensionistët amerikanë mund të qëndrojnë fillimisht si turistë deri në një vit, periudhë që u mundëson aplikimin për leje më afatgjata, siç janë “Leja unike” për nomadët dixhitalë ose Viza e Qëndrimit të Gjatë (Viza D). Për çiftet, kërkohet një dëshmi e të ardhurave vjetore nga pensioni prej rreth 20 000 dollarësh nga jashtë vendit.
Ndër sfidat e përmendura janë mungesa e një traktati tatimor për shmangien e taksimit të dyfishtë me SHBA-në, si dhe nevoja për ndalesa gjatë fluturimeve ajrore. Sa i përket gjuhës, Forbes vlerëson se anglishtja flitet gjerësisht nga të rinjtë shqiptarë, edhe pse gjuha shqipe, me 36 shkronjat e saj, mbetet një sfidë për t'u përvetësuar.
Së bashku me Shqipërinë, në listën e rekomandimeve të Forbes janë përfshirë edhe vende si Argjentina, Austria, Kanadaja, Kolumbia, Kosta Rika, Qiproja, Franca, Irlanda, Greqia, Italia, Malta, Mali i Zi dhe Portugalia.